Nadakpan sa gilusad nga Simultaneous Anti-Criminality Law Enforcement Operation o SACLEO ang usa ka lalaki nga gilista isip Top 1 Provincial Level Most Wanted Person sa Padada Municipal Police Station.
Ang suspek giila nga si Resmundo Ballecud Solomon, 51-anyos, mangingisda ug residente sa Barangay Piape, Padada, Davao del Sur. Nadakpan nakalabay nga adlaw sa Lower Banualan, Barangay Tambler, General Santos City.
Sumala sa kapulisan, giatubang sa suspek ang walo ka ihap sa kasong Qualified Rape of a Minor ubos sa Revised Penal Code, nga walay girekomendar nga piyansa, base sa warrant of arrest nga gipagawas ni Honorable Maria Fe Orig-Malololoy-On, Presiding Judge sa Family Court Branch 5 sa Digos City.
Gipahigayon ang operasyon sa Padada Municipal Police Station Tracker Team ubos sa pagdumala ni PCPT Arturo P. Papas Jr., OIC, uban sa nagkadaiyang support units sa kapulisan.
Sa pagkakaron, anaa na sa kustodiya sa Padada Municipal Police Station ang suspek alang sa hustong legal nga proseso.
