Nagpositibo ang duha ka security personnel sa LGU Iligan sa gipahigayon nga drug test nga niadtong miaging bulan og gilayon gitangtang sa trabaho. Sumala ni Security Officer IV Marlon A. Clapano, Head sa Security Management Division, hugot karon ang disiplina sa Civil Security Unit aron masiguro ang integridad sa mga personnel.
Matod ni Jobes Ocampo, administrador sa buhatan, kabahin kini sa ilang kampanya sa paglimpyo sa han-ay sa seguridad sa siyudad. Gipadayon usab sa CSU ang regular nga drive formation matag duha ka bulan ug pagmonitor sa mga government offices ug property 24/7.
Sukad nga nagsugod sa posisyon si Clapano niadtong Hulyo 1, 2025, giingon niyang adunay dagkong kausaban sa unit pinaagi sa pagsunod sa security manual ug pagpalig-on sa operasyon sa mga personnel nga nagbantay sa City Hall ug uban pang pasilidad sa gobyerno.
Sa pagkakaron, adunay 274 ka security personnel nga nagbantay sa 44 ka barangay sa Iligan City. Sa katapusan, gipasalig ni Clapano nga mobuhat gayud sa trabaho ang iyang mga personnel sa paghatud sa nindot ug tinuod nga serbisyo publiko.
