Dakpan sa kapulisan ang usa ka lalaki kinsa nagpayuhot sa ginadiling drogang shabu pinaagi sa gipahigayon nga drug buy-bust operation didto sa Purok Silangan, Brgy Miputak, Dipolog City, Zamboanga Del Norte niadtong nakalabay nga adlaw.
Wala na hinganli ang dinakpan, nga 46-anyos, minyo ug residente sa Katipunan Street sa nasangpit nga barangay.
Narekober gikan sa dinakpan ang usa ka gamay nga pakete sa shabu nga nagsilbing buy-bust item ug lain pang duha ka gagmayng pakete sa shabu nga nakuha gikan sa iyang posisyon.
Dugang narecover gikan sa suspetsado ang 500 peso bill nga gigamit isip buy-bust money, usa ka cigarette pack nga nagsilbing container sa droga, ug usa ka disposable lighter. Motimbang sa 1 ka gramo ang timbang sa nasakmit nga droga nga nagkantidad og Php6,800.00.
Nakakustudiya na sa Dipolog City Police Station ang dinakpan alang sa tukmang disposisyon samtang ang mga nasakmit nga mga ebidensya giturnover ngadto sa ZDN Provincial Forensic Unit alang sa eksaminasyon.
Photo Courtesy: Dipolog CPS
