Nagpasikat pag-usab ang beteranong bowler nga si Luther Tapaya human makuha ang titulo sa Sugbu Bowling Shootout nga gipahigayon SM Seaside Bowling and Leisure Center.
Nakapuntos si Tapaya og 205 pinfalls sa championship match aron mapildi ang Division A bowler nga si Joma Avila nga mitapos sa 181, samtang si Orly Enoveso sa Division C mitapos sa ikatulong pwesto uban sa 171 pinfalls.
Bisan adunay 20-handicap points, gipakita ni Tapaya ang iyang kasinatian ug katukma sa dula pinaagi sa 185 scratch score. Sa qualifying rounds, siya usab ang nanguna sa 765 pinfalls, gisundan nila Celis Viloria (749) ug Chris Ramil (740).
Sa ubang dibisyon, nanguna si Enoveso sa Division C qualifiers nga adunay 722 pinfalls, samtang si Avila usab ang nag-una sa Division A qualifiers nga adunay 835 pinfalls.
