Giklaro sa kagamhanang probinsyal sa Bukidnon nga dili tinuod ang nagkatag nga impormasyon nga gidid-an ang mga Lumad sa pagbaligya sa ilang mga produkto, ilabina sa mga beads, sulod sa selebrasyon sa Kaamulan Festival ning tuig 2026.
Sa exclusive nga pakighinabi sa Juander Radyo Malaybalay kang Cornelio Melan L. Cruz II – Event Committee Chairperson iyang gikasubo ang pagpost sa social media sa usa ka lumad human nakadawat og sayop nga impormasyon nga did-an matod sila sa pagpamaligya atol sa festival og gipasabot nga ang Kaamulan usa ka selebrasyon sa kultura ug tradisyon sa mga tribo sa Bukidnon, busa imposible nga walay luna ang mga lumad sa maong okasyon.
Matod pa matag tuig adunay mga pavilion o payag nga gitagana alang sa pito ka tribo aron didto sila makabaligya sa ilang mga tradisyonal nga produkto sama sa beads, handicrafts ug uban pa samtang adunay booth usab nga gipahimutang sa National Commission on Indigenous Peoples aron suportahan ang mga Indigenous Peoples nga gustong mamaligya sa ilang mga produkto.
Gihangyo sa opisyal ang mga Lumad nga makig-coordinate sa ilang lokal nga kagamhanan o sa Tourism Officers aron makabalo sa hustong proseso sa pag-apil sa festival.
Nasayran nga ang Kaamulan Festival sa Bukidnon magsugod sa Marso 19 hangtod Abril 23, 206.
