Miabot sa Pilipinas ang 299 ka mga Pilipino nga naapektuhan sa nagpadayon nga tensyon ug gubat sa Middle East. Sumala sa Department of Migrant Workers o DMW, luwas nga nakauli ang grupo niadtong Huwebes, Marso 5, 2026.
Matod sa ahensya, ang uban sa mga OFW gipapauli alang sa ilang kaluwasan base sa tambag sa ilang employer. Ang uban usab kay mga OFW nga nahuman na ang kontrata, samtang ang pipila mipauli tungod sa personal nga rason ug plano nga magpabilin na sa Pilipinas.
Nilanding ang grupo sa NAIA Terminal 3 gikan sa Dubai sakay sa Emirates Flight 336 diin gisugat sila ni Migrant Workers Secretary Hans Leo Cacdac. Gihatagan sila og pinansyal nga tabang, temporaryong kapuy-an, pamasahe pauli sa probinsya, medical assistance, ug psychosocial support.
Sa karon, nagpadayon ang kagubot sa Middle East nga hinungdan sa daghang kanselasyon sa mga biyahe sa eroplano. Sumala sa Cirium, kapin 20,000 ka flights ang nakansela gikan sa sobra 36,000 nga naka-iskedyul. Sa ubang nasod sama sa Qatar ug Bahrain, halos walay flights nga gitugotan, samtang daghan usab ang nakansela sa Israel ug United Arab Emirates.
Photo Courtesy: DMW
