Gipahigayon na ang ikaduhang hugna sa paghipos sa mga basura sa syudad sa Iligan. Sumala sa Public Service Division, samtang nagpadayon ang paningkamot sa lokal nga panggamhanan nga mapahiuli ang kahapsay human sa grabing pagbaha.
Sa interbyu kang Public Service Division Head Aldwin Caburnay, iyang gipadayag nga padayon ang ilang operasyon matag gabii aron malikayan ang trapiko ug mas mapadali ang paglimpyo sa mga apektadong lugar. Una nang gipahigayon ang regular nga koleksyon sa mga lugar nga wala maapektohi, samtang gihimo usab nga usa ka tapok ang mga basura sa grabing natandog nga mga barangay aron mas sayon kini makuha.
Apan, wala pa maapil sa koleksyon ang Mahayahay tungod sa grabing pagbaha nga nakaapekto sa dalan. Gani, ang Mahayahay ug Tubod maoy giila nga pinakagrabe ang kadaot sa miaging kalamidad.
Gipasalamatan usab ni Caburnay ang nagkadaiyang ahensya ug boluntaryo nga mitabang sa clearing operations, lakip ang Department of Public Works and Highways, City Engineers Office, mga boluntaryo gikan sa Lanao ug Bukidnon.
