Nagmalinawon ang gipahigayong programa atol sa ika-40 ka tuig nga kasumaran sa Edsa People Power Revolution nga gipahigayon kagahapong adlawa. Mismong si Msgr. Nathaniel Lerio, sa Archdiocese of Cagayan de Oro nagpaambit sa iyang kasinatian ug sa ilang pamilya kinsa nakasinati sa kabangis sa militarisasyon niadtong panahona.
Saysay pa niya, tuod adunay halapad nga lihok protesta ug pagsukol ang natala sa kauluhan apan bisan sa ilang gamay nga baryo nakasaksi sab sila og mangilngil nga mga panghitabo ug pagpangabuso sa tawhanong katungod.
Busa, alang kang Msgr Lerio, dili makatarunganon nga ilubong sa limot ang makasaysayanon nga panghitabo nga People Power Revolution nga ning tapos sa pila ka tuig nga diktadurang rehimen ug naghibalik sa demokrasya sa nasud.
Kagahapong adlawa, nagmalinawon ang gihimong programa nga gipangunahan sa Archdioscese of Cagayan de Oro ug gitambungan sa gatusan ka mga Katoliko nga giduyugan sa mga miyembro sa Iglesia Filipina Independiente.
