Giila karon nga usa sa may dakong potensyal nga agricultural commodity sa rehiyon ang kape, nga makahatag og benepisyo dili lamang sa mga mag-uuma kundili usab sa mga konsumidor ug sa lokal nga ekonomiya, ilabi na sa merkado sa syudad.
Tungod niini, giaghat sa Department of Trade and Industry o DTI Region 10 ang mga coffee farmers sa Northern Mindanao nga moapil sa usa ka regional competition aron maila ug marekognisa ang kalidad sa ilang coffee beans.
Sumala ni Julie Ann Nieva-Costales, Information Officer sa DTI-10, dako kini nga oportunidad alang sa mga mag-uuma aron mapaila ang ilang produkto sa mas lapad nga merkado pinaagi sa Northern Mindanao Regional Coffee Quality Competition nga ipahigayon sa Central Mindanao University sa Musuan, Bukidnon.
Gipasabot niya nga ang kompetisyon dili lamang pagtigi sa kalidad kundili usa usab ka paagi aron mapalambo ang produksyon, mapataas ang presyo sa kape, ug madugangan ang kita sa mga mag-uuma. Dugang pa, makatabang kini sa paghatag og kasiguruhan sa mga konsumidor nga de-kalidad ang ilang mapalit nga kape gikan sa rehiyon.
Gilauman nga pinaagi sa kompetisyon, mas daghang coffee farmers ang ma-engganyo nga pauswagon ang kalidad sa ilang produkto ug mas mapalig-on ang coffee industry sa Northern Mindanao isip usa ka kompetitibong sektor sa merkado sa nasud.
Photo courtesy: Cool Farm Tool
