Patay ang dili mo menus sa 19 ka indibidwal human mahulog ang usa ka bus sa suba sa Nepal niadtong nakalabay nga Lunes. Gikabutyag nga lakip sa mga namatay ang usa ka British tourist.
Nahulog ang bus nga gikan sa highway human madigyas sa bukirong bahin sa dalan ug diretso nga nahagbong sa kapin 200 metros paingon sa usa ka sapa sa Dhading district. Sa kinatibuk-an 44 ka pasahero ang sakay sa bus, diin 19 ang namatay samtang 25 ang padayon nga ginatambalan sa ospital. Gikompirmar usab sa mga pulis nga usa ka British citizen ang apil sa mga namatay. Aduna usab usa ka Chinese ug usa ka New Zealander nga nasamdan sa insidente.
Gikabutyag nga daghan nang nadisgrasya sa maong dalan sa Nepal tungod sa delikadong plastada sa mga kalsada, kakulang sa maintenance sa mga sakyanan, ug reckless driving mismo sa mga tigmaneho. Niadtong Hulyo 2024, duha ka bus nga may kapin 50 ka pasahero ang naigo usab sa maong suba human sa landslide.
Kahibaloan nga niadtong mga miaging tuig, daghang delikado nga aksidente sa bus ang nahitabo sa Nepal tungod sa delikado ug bukirong mga kalsada, overloading sa mga sakyanan, ug kakulang sa kasinatian sa mga drayber.
Niadtong 2011, labing menos 40 ka tawo ang namatay human ang usa ka bus nahulog sa usa ka suba sa silangang Nepal, samtang sa 2012, usa ka overloaded bus ang nahulog sa usa ka kanal sa Nawalparasi district nga mikalas sa kinabuhi sa 35 ka tawo. Sa parehong tuig, usa ka bus usab sa Kalikot district ang nahulog sa 400 metros nga pangpang diin nikalas sa kinabuhi sa 29 ka pasahero, samtang sa Surkhet ug Doti districts, daghang pasahero usab ang namatay sa samang klase nga mga aksidente.
Sa ubang susama nga mga insidente, niadtong tuig 2016, usa ka bus sa laing distrito ang nahulog sa 300 metros nga pangpang ug mikalas sa 33 ka tawo samtang 38 ang nasamdan. Sa parehas nga tuig, usa ka bus sa central Nepal, ang nahulog sa Trishuli River ug nikalas sa 21 ka tawo, samtang 17 ang na-rescue ug tulo pa ang na missing. Kini nga mga kaso nagpamatuod sa kakuyaw sa transportasyon sa bukirong bahin sa lugar ug peligro sa mga pasahero sa bus sa nasud sa Nepal.
