Hugot na karon gimonitor sa mga otoridad uban sa kagamhanan sa barangay Managok Malaybalay City ang mga “person of interest” nga giingong ningsulod ug nangawat sa tulo ka panimalay pasado alas 2:00 sa kadlawon didto sa Purok 11, Sitio Anduhon ug sa Purok 7, Sitio Reles, Malaybalay City, Bukidnon.
Gibutyag ni Kagawad Jerry Billones, Peace and Order Council chairman sa maong barangay, nga unang gikawatan ang panimalay ni Virginia Balaba uban ang pamilya niini.
Sumala pa samtang nangatulog ang pamilya, nakuha sa mga suspetsado ang kantidad nga ₱10,000, tulo ka cellphone, ug mga bag sa iyang mga anak. Human niini, gisunod dayon sa mga kawatan ang balay ni Rozel Dopin sa Sitio Anduhon. Ang katapusang biktima mao si Joan, residente sa Purok 7, diin nakuhaan gihapon kini og personal nga mga butang ug kwarta.
Dugang pa ni Billones, gituohang gipahimuslan sa mga kawatan ang kusog nga pag-ulan niadtong tungora diin tungod sa dili maayong panahon, nakasinati og kalisod ang mga tanod sa pagpahigayon og regular nga pagpatrolya sa maong mga lugar
Gipahinumdoman ang publiko nga magmatngon sa mga kahimtang ug magreport dayon sa kapulisan o sa barangay kung adunay mabantayang kadudahang lihok aron kini maaksyonan sa labing madali nga panahon.
Padayon karon ang imbestigasyon sa insidente samtang ginabuhat sa mga otoridad ang tanang lakang aron masuta ang mga responsable ug malikayan ang susamang hitabo sa umaabot.
Photo Courtesy: JERRY BILLIONES
