Gipadayag ni Senador Robin Padilla nga andam siya nga modagan isip bise presidente sa 2028 ubos ni Sara Duterte, kon personal siyang hangyoon ni kanhi Presidente Rodrigo Duterte.
Sa iyang pahayag, gibutyag sa action star–turned–politician nga si Duterte lamang ang makamando sa iyang desisyon may kalabotan sa pagdagan sa mas taas nga posisyon sa gobyerno. Matud niya, dili gyud siya ganahan sa pulitika, apan andam siyang mosunod kon kini ang kabubut-on sa kanhi presidente.
Gitin-aw ni Padilla nga bukas siya sa bisan unsang posisyon sa umaabot nga eleksyon ug gihulagway ang papel sa bise presidente nga mas nakapokus sa mga adbokasiya ug mga programang sosyal.
Una niini, miangkon ang senador nga personal lamang niyang opinyon ang napakatag nga posibleng tandem nila ni VP Sara ug ni Imee Marcos. Giingon niyang dili kini opisyal nga baruganan sa iyang partido, ang Partido Demokratiko Pilipino (PDP).
Mahinumduman nga sayo pa nga gideklarar ni VP Sara ang iyang presidential bid alang sa 2028, taliwala sa impeachment complaint nga iyang giatubang sa Kamara.
Apan alang kang Padilla, prangka nga “no” ang iyang tubag kon muabot man sa Senado ang impeachment case batok kang VP Sara, nga nagpasabot sa iyang klarong pagsuporta sa bise presidente.
Photo Courtesy: SENADOR ROBIN PADILLA
