Patay ang duha ka indibidwal sa nahitabong trahedya niadtong nakalabay nga adlaw, sa Purok Malipayon, Barangay Managa, Bansalan human ang usa ka Isuzu Canter nga nagkarga og kapin kun kulang 100 ka kahon nga kamatis nawad-an og preno ug nidaro sa duha ka motorsiklo.
Sumala sa report sa Bansalan Municipal Police Station (PMAJ Fidelito U. Viola Jr., OIC). Ang Isuzu Canter nga gimanihoan ni Florencio Lorque, 39-anyos, ug ang iyang kauban nga si Dave Palugar, 27-anyos, residente sa Igpit, ang maong trak gikan Kapatagan paingon sa Bansalan proper.
Ang mga nadamay mao si Kenu Samayla, driver sa Honda XRM 125, kinsa residente sa Purok Lubi A Barangay Managa,Bansalan ug si Reynante Salar nga nagmaneho sa Honda TMX uban ang iyang passenger nga si Laylay Granada, pareho nga residente sa Purok Lubi A, Barangay Managa.
Sumala sa imbestigasyon, ang trak nga kusog ang padagan, nawad-an og kontrol samtang pabahada kini ug nakapasamot pa sa sitwayson ang basa ug danlog ang dalan.
Una nga naigo ang Honda XRM 125, dayon ang Honda TMX. Tungod sa grabeng impact, ang duha ka drivers ug ang usa ka passenger nag-antos og grabe nga samad sa kalawasan.
Pipila ka gutlo ang milabay,nahidangat ang Bureau of Fire Protection ambulance ug gipangkarga ang mga biktima ug gidala sila sa Viacrucis Hospital, apan gideklarar nga dead on arrival si Kenu Samayla ug ang pasahero sa Honda TMX nga si Laylay Granada. Ang uban nga naapil, lakip ang driver sa Isuzu Canter, gidala sa Provincial Hospital alang sa medikal nga pag-atiman.
Gidala na sa Funeral Homes ang mga patay nga lawas sa mga biktima samtang padayon ang imbestigasyon sa Bansalan MPS.
