Gidakop si Barangay Kapitan Adela Areja sa Barangay Can-ibuang sa lungsod sa Catmon, lalawigan sa Sugbo sa mga sakop sa Philippine National Police sa Catmon, human mapasakaan og kaso sa korte nga may kalabutan sa giingong ilegal nga pagputol og 72 ka punoan sa lubi sa Catmon.
Ikustodiya siya sulod sa katapusan sa semana ug nakapagpiyansa og ₱42,000. Kauban usab nga gidakop ang payloader operator nga si Florigen Bato, nga nigamit sa backhoe sa MDRRMO Catmon alang sa maong proyekto sa karsada sa Purok 3, Lutak, padulong sa Barangay Tinabyonan.
Sumala sa Philippine Coconut Authority o PCA, walay giisyu nga permit sa pagputol sa mga lubi alang sa proyekto, nga gikinahanglan ubos sa Republic Act No. 8048 nga giusab sa Republic Act No. 10593.
Gibutyag ni Engr. Johndom B. Domagtoy, Provincial Director sa PCA Cebu, nga obligadong adunay permit una putlon ang mga punoan sa lubi, ug dili dawaton sa korte ang depensa nga “honest mistake.”
Sa pagkakaron, wala pa’y opisyal nga pahayag si Mayor Avis Monleon kalabot sa isyu diin padayon ang imbestigasyon sa maong kaso.
