Gipaniguro sa National Irrigation Administration (NIA) Region 9 nga modonar pa ngadto sa usa ka gatus ka tuig ang Mahayag Dam human kini gi-inagurahan niadtong nakalabayng semana.
Kini ang pagpaniguro ni NIA 9 Regional Manager Engr. June Nathaniel S. Plaza sa iyang gipadangat nga pamahayag atol sa inagurasyon sa Mahayag Dam sa Lower Salug Dako, Mahayag, Zamboanga del Sur.
Gisaysay ni Regional Manager Plaza, ang bag-ong girehab nga Mahayag Dam , mas lig-on ug mapuslan pa pila ka tuig ug andam mohatag ug padayong patubig alang sa mga mag-uuma.
Una nang giingon RM Plaza, ang Mahayag Dam mao ang pinakaunang mass concrete dam nga adunay walo ka agianan sa tubig ug pinakadakong dam nga nahimo sa Zamboanga Peninsula Region.
Ang maong Dam mahimong makapatubig sa musobra 8 mil ka mga ektaryang luna nga mapahimuslan sa sobra 5 mil ka mga mag-uuma sa humay gikan sa Mahayag, Sominot, Ramon Magsaysay ug Molave.
Mapasalamaton si RM Plaza ngadto National Disaster Risk Reduction and Management Council gumikan sa paggahin ug pondo gikan sa NDRRM Fund nga nagkantidad ug Php450,000,000.00.
