Misaka ang ihap sa mga batan-ong sayo nga pakigrelasyon sa Nabunturan, Kini sumala sa Municipal Registered Psychometrician nga si Janice Maria Hizon. Sa pakighinabi sa Juander Radyo News Team, gipadayag ni Hizon nga nagkadaghan ang mga ginikanan ug kabatan-onan nga nangayo og tambag may kalabutan sa emosyonal nga epekto sa sayo nga pagsulod sa relasyon.
Matod niya, kini usa sa nag-unang hagit nga giatubang sa kasamtangang henerasyon sa kabatan-onan. Gibutyag usab ni Hizon nga kadaghanan sa iyang mga kliyente mao ang mga estudyante nga naapektuhan sa peer pressure, impluwensya sa social media, ug kakulang sa hustong paggiya gikan sa pamilya.
Tungod niini, nagkadaghan ang mga kabatan-onan nga nakasinati og emosyonal nga kalibog ug stress nga may kalabotan sa relasyon. Bisan pa niini, gipasiugda ni Hizon nga ang sayo nga pakigrelasyon dili kanunay negatibo.
Sumala kaniya, kabahin kini sa natural nga pagdako sa mga batan-on, apan nagkinahanglan kini og hustong paggiya ug bukas nga komunikasyon tali sa ginikanan ug mga anak aron malikayan ang posibleng negatibong epekto.
Giawhag niya ang mga ginikanan nga magpabiling bukas ug paminawon ang mga anak aron mas masabtan ang mga isyu nga ilang nasinatian.
