Nakaangkon ug samad bun-og sa lawas ang usa ka lalaki human kini mabangaan ug motorsiklo sa Crossing Mapantad, Brgy. Sainz, Mati City, Davao Oriental pasado alas 4:20 sa hapon, Pebrero 15, 2026.
Subay sa impormasyon nga nahipos sa Juander Radyo Mati pinaagi sa usa ka saksi, nasayran nga misulay sa pagtabok ang biktima uban sa iyang asawa ug anak sa pedestrian lane, apan sa wala damha kalit kini nabanggaan sa naghaguros nga motorsiklo.
Tungod sa impak, nakaangkon ug samad sa lawas ang biktima. Dali usab nga miresponde ang mga sakop sa City Disaster Risk Reduction and Management Office (CDRRMO) alang sa paghatag ug medikal nga pag-atiman.
Gilayong gidala ang biktima sa Davao Oriental Provincial Medical Center alang sa dugang medikasyon.
Sa kasamtangan padayon pa ang imbestigasyon sa mga awtoridad kabahin sa maong insidente. Gipahimangnoan ang mga motorista nga mag amping sa pagbyahe ingon man sundon ang batas trapiko aron malikay sa susamang disgrasya.
