Nakaplagan ang gi chop-chop nga lawas sa usa ka lalaki nga gisulod sa drum sa atubangan sa Delpan Sports Complex sa Mel Lopez Boulevard northbound, Barangay 275, sa Binondo Manila. Nakita kini Domingo sa gabii Pebrero 15. Sumala sa inisyal nga report sa kapulisan, nadiskubrehan ang mga parte sa lawas mga alas 7:30 sa gabii ug gitaho sa mga awtoridad mga alas 7:45 sa gabii.
Giputos sa itom nga trash bag ang mga parte sa lawas nga nakita sa daplin sa kalsada. Samtang duha ka lalaki ang nakakita sa maong drum. Base sa ilang pamahayag, adunay mihunong nga puti nga utility van sa ibabaw sa Mel Lopez Bridge diin adunay duha ka lalaki nga ninaog og ginaog ang blue nga drum nga giputos og plastic tape.
Giingong gisugo ang duha ka saksi nga ilabay ang drum ug gihatagan pa og kwarta isip bayad. Human milarga ang van padulong northbound sa Mel Lopez Boulevard, gisakay sa mga saksi ang drum sa ilang kariton ug gibiyaan sa kilid sa kalsada atubangan sa Delpan Sports Complex.
Sa dihang giablihan nila ang sulod, ilang namatikdan ang plastic bag nga adunay sulod nga mga parte sa lawas sa tawo ug dayon gitaho sa awtoridad. Gidala ang mga parte sa lawas sa Funeraria Cruz alang sa eksaminasyon samtang nagpadayon ang imbestigasyon aron mailhan ang biktima ug ang responsable sa maong krimen.
Photo Courtesy: MPD
