Gipahibalo sa Dakbayan sa Malaybalay ang pagpatuman sa Ordinance No. 1076, Series of 2026, nga nag-institutionalize sa anniversary-based renewal sa business permits, usa ka lakang nga gituohan nga makapaayo sa serbisyo sa lokal nga panggamhanan (LGU).
Subay sa ordinansa, ang pag-renew sa business permit himoon base sa anibersaryo sa registration sa matag negosyo. Pinaagi niini, malikayan ang dagsa ug taas nga pila kasagaran matag Enero sa tradisyonal nga sistema sa renewal.
Matod ni Salvador Yacapin, Licensing Officer IV sa Business Permit and Licensing Division Office sa Exclosibong pakighinabi sa Juander Radyo Malaybalay, dako kini nga ikatabang sa mga negosyante tungod kay mas flexible ang iskedyul ug dili na sila ma-pressure sa usa lamang ka takdang panahon sa pag-renew.
Dugang pa niya, mapagaan usab ang trabaho sa mga empleyado sa gobyerno tungod kay mas organisado ang proseso ug mas paspas ang paghatag og serbisyo sa katawhan.
Ang maong lakang nagpakita nga ang lokal nga pangagamhanan nagsunod sa Ease of Doing Business Act, nga nagtumong sa pagpadali ug pagpaayo sa mga transaksyon sa gobyerno.
Sa kinatibuk-an, giisip ang ordinansa nga positibo nga inisyatiba nga makabenepisyo dili lamang sa sektor sa negosyo kondili usab sa tibuok komunidad pinaagi sa mas episyente, transparent, ug sistematikong pagdumala sa business permits.
Photo Courtesy: LGU MALAYBALAY
