Giaprubahan sa Senado sa ikatulo ug katapusang pagbasa ang balaudnon nga magtukod sa Philippine Geriatric Center (PGC), usa ka espesyal nga ospital nga nagtumong sa pagpausbaw sa serbisyong panglawas alang sa mga tiguwang o senior citizen nga mga Pilipino.
Ang Senate Bill 1509 o ang Philippine Geriatric Center Act, giduso ni Sen. Risa Hontiveros. Gilauman ni Hontiveros nga daling mahimong balod kini, ilabi na nga aduna nay bersyon nga napasar ang Ubos Balay-Balauran (Kamara) niadtong Disyembre 2025, ug giisip kini nga prayoridad sa Legislative Executive Development Advisory Council. Nalakip usab kini sa legislative agenda sa Department of Health (DOH).
Matod pa ni Hontiveros, kini mahitungod sa paghatag og pasidungog sa mga katigulangan, pagsiguro nga sila mabuhi og mas taas, mas himsog nga panglawas uban ang dignidad ug access sa pag-atiman.
Ang PGC mamahimong usa ka espesyal nga ospital nga maghatag og barato ug de-kalidad nga serbisyo sa panglawas alang sa mga senior citizen. Tumong usab niini nga palig-onon ang nationwide geriatric health services sa tibuok nasod kauban ang DOH, mga lokal nga kagamhanan (LGU), ug uban pang sektor.
Aron masiguro nga dili mahimong “white elephant” o walay pulos nga proyekto ang PGC, naglakip og amyenda si Hontiveros sa balaodnon. Gitakda usab sa maong balaod nga ang modumala sa PGC kinahanglan nga usa ka lisensyadong doktor nga adunay igong kasinatian sa geriatric care ug pagdumala og ospital.
Photo courtesy: Inquirer
