Patay ang usa ka 22-anyos nga Australian snowboarder atol sa iyang bakasyon uban sa mga higala sa Japan human masab-it ang buckle sa iyang backpack sa usa ka ski lift sa Tsugaike Mountain Resort sa Hakuba Valley, sa Nagano Province.
Sumala sa Nagano Omachi Police, naangol ang biktima niadtong Biyernes ug giatake sa cardiac arrest human dili siya makanaog sa ski lift tungod kay nasab-it ang waist buckle sa iyang backpack sa lingkuranan sa lift.
Tungod kay naka-fastened ang chest strap sa backpack, wala kini mabungkag sa iyang lawas ug nadala siya sa paglihok sa lift.
Giingon sa Tsugaike Gondola Lift Co. nga diha-diha dayong gipahunong sa personahe ang operasyon sa lift pinaagi sa emergency stop button ug gihatagan dayon og tabang ang biktima ug dayon gidala sa ospital.
Bisan pa niini, wala na siya maluwas ug namatay human sa pipila ka oras. Mipa-abot og lawom nga pahasubo ang kompanya sa pamilya sa biktima ug misaad nga palig-onon pa ang mga lakang sa kaluwasan aron malikayan ang susamang insidente sa umaabot.
Gikompirma usab sa Australia’s Department of Foreign Affairs and Trade nga usa ka Australianong lungsoranon ang namatay sa Japan ug naghatag na sila og consular assistance sa namatyan nga pamilya.
Photo Courtesy: BRN
