Nagpagula og opisyal nga pamahayag ang kampo ni Bise Presidente Sara Duterte mahitungod sa subli nga pagpasaka og mga impeachment complaint batok kaniya.
Sumala ni Atty. Michael Poa, ang tigpamaba sa depensa ni Duterte, wala na sila nakurat sa lakang sa mga nagpasiugda sa reklamo. Gipasiugdahan sa kampo nga bag-o lang giklaro sa Korte Suprema nga ang impeachment dili lang basta-basta nga prosesong politikal nga nagbase lamang sa mga alegasyon ug propaganda.
Kini usa ka constitutional mechanism nga kinahanglang mosunod sa sumbanan, ebidensya, ug saktong proseso. Gipahayag ni Poa nga andam silang moatubang sa mga pasangil pinaagi sa saktong proseso sa konstitusyon.
Masaligon usab ang kampo nga sa patas ug walay gidapigan nga pagpaminaw, mapamatud-an nga walay basehan sa kamatuoran ug sa balaod ang mga akusasyon. Sa kinatibuk-an, nibarog ang defense team nga ang impeachment batok kang Duterte usa ka hagit nga ilang atubangon sa tibuok kaisog ug pagsalig sa hustisya.
Photo courtesy: Edge Davao
