Nasikop sa hiniusang pwersa sa Asuncion Municipal Police Station Station Drug Enforcement Team (SDET) ug PDEA Davao del Norte isip Lead Unit ang tulo ka High Value Target (HVT) sa usa ka buy-bust operation niadtong alas 10:28 sa gabii sa Enero 29, 2026, sa Brgy. Doña Andrea, Lungsod sa Asuncion, ubos sa pagdumala ni PMaj Collin S. Rama, Hepe sa Asuncion Police Station.
Ang mga dinakpan giila nga sila alyas “Chong,” “Andoy,” ug “Jeje,” nga parihong mga residente sa maong barangay. Sumala pa ang operasyon miresulta sa pagkadakop sa mga suspek tungod sa ilang paglambigit sa pagpamaligya og illegal nga droga.
Nakuha sa maong operasyon ang gibanabana nga 15 gramos sa gituohang shabu nga adunay Standard Drug Price nga mokabat sa Php102,000.00.
Narekober usab ang usa ka tinuod nga P1,000 nga buy-bust money, pito ka libo ka pesos nga machine copy nga boodle money, mga drug paraphernalia, ug usa ka selpon nga gipanag-iya sa usa sa mga suspetsado.
Ang tanang ebidensya gimarkahan ug giinbentaryo atubangan sa presensya sa mga mandatory witnesses subay sa balaod.
Sa pagkakaron, ang mga suspek detenado sa Asuncion Municipal Police Station ug mag-atubang sa kasong paglapas sa Republic Act 9165 o Comprehensive Dangerous Drugs Act of 2002 nga ipasaka sa korte sa probinsya sa Davao del Norte.
Photo Courtesy : PNP DavNor Asuncion MPS
