Posibleng mosaka ang presyo sa mga produktong petrolyo sunod nga semana, sumala sa Department of Energy (DOE). Matod ni DOE Oil Industry Management Bureau Director Rodela Romero, base sa upat ka adlaw nga dagan sa kalibutanong patigayon, mamahimong mosaka ang gasolina og mga Php 0.10 matag litro, ang diesel og Php 0.85, ug ang kerosene og Php 0.45.
Gipasabot ni Romero ang pipila ka rason sa pagsaka sa presyo, lakip na ang pagkalangan sa suplay sa Estados Unidos tungod sa daot nga panahon nga nakapalangan sa produksyon og hangtod sa 2 ka milyon ka bariles matag adlaw. Apil usab niini ang hinay nga pagbalik sa operasyon sa Tengiz field sa Kazakhstan human sa nahitabong sunog ug problema sa kuryente, ang nagkataas nga risk premium sa Iran, ug ang desisyon sa OPEC+ nga ihunong una ang pagpasaka sa produksyon.
Dugang pa niya, wala pay labot sa banabana ang operating cost ug uban pang premium sa mga kompanya sa lana. Ang opisyal nga anunsyo sa kausaban sa presyo himoon matag Lunes ug ipatuman sa mosunod nga adlaw (Martes).
Photo Courtesy: Philippine News Agency
