Mikunhod og 57 porsyento ang kantidad sa mga pamuhunan nga giaprobahan sa Philippine Economic Zone Authority (PEZA) karong tuiga , sumala sa datos sa ahensya.
Sa unang bulan sa tuig, 18 ka proyekto ang giaprobahan sa PEZA nga adunay kinatibuk-an nga ₱12.86 bilyon, nga mas ubos og 57.36 porsyento kumpara sa ₱30.16 bilyon nga naitala niadtong Enero 2025.
Mikunhod usab ang gidaghanon sa gilaumang mga trabaho, gikan sa 3,270 ka trabaho niadtong miaging tuig ngadto sa 1,005 ka trabaho karong Enero.
Bisan pa sa pagkunhod sa kantidad sa pamuhunan, giingon sa PEZA nga ang mga proyekto gilauman nga makahatag og mas dako nga kita gikan sa eksport nga moabot sa $59.74 milyon, nga mas taas og 85.64 porsyento kumpara sa $32.18 milyon niadtong Enero 2025.
Matod ni Trade Secretary Cristina Roque, nga mao usab ang chair sa PEZA Board, ang pagdasig sa mga pamuhunan nga export-oriented ug gipang-apod-apod sa nagkalain-laing rehiyon makatabang sa pagpalig-on sa inklusibong pagtubo sa ekonomiya ug sa pagpaambit sa mga benepisyo sa global nga patigayon sa mas daghang lugar sa nasud.
Alang sa 2026, target sa PEZA nga makaaprobahan og ₱300 bilyon nga kantidad sa pamuhunan, nga mas taas og 14.99 porsyento kumpara sa ₱260.89 bilyon nga giaprobahan niadtong 2025. Target usab sa ahensya nga mapataas ang job generation ngadto sa 100,000 ka trabaho, gikan sa 78,741 ka trabaho niadtong miaging tuig.
Sa 18 ka proyekto nga giaprobahan, pito niini anaa sa manufacturing sector, lima sa ecozone development, ug duha sa information technology ug business process management sector. Ang nahibilin naglakip sa domestic ventures, utilities, logistics, ug turismo.
Usa sa pinakadakong proyekto mao ang tourism enterprise sa Parañaque City nga nagkantidad og labaw sa ₱5 bilyon, nga gilauman nga mopatibay sa urban tourism, hospitality, ug mga serbisyo sulod sa ecozones. Duha pa ka dagkong proyekto nga nahimutang sa Misamis Occidental ug Batangas, nga adunay kinatibuk-ang bili nga ₱5.9 bilyon, naglakip sa land banking ug sa pagpalambo sa industrial ug commercial spaces alang sa export-oriented nga mga negosyo.
Matod ni PEZA Director General Tereso Panga, mas maampingon karon ang mga mamumuhunan, nga nagpunting sa kalig-on, episyensya, ug dugayng bili sa ilang pamuhunan. Bisan pa niini, giingon niya nga padayon gihapon nga lig-on ang mga pundasyon sa ekonomiya sa Pilipinas nga naghatag og pagsalig sa mga export-oriented investments.
Kadaghanan sa mga proyekto anaa sa Luzon, apan tulo lamang niini ang mahimutang sa Metro Manila. Napulo ka proyekto ang ipatuman sa Calabarzon, duha sa Central Visayas, ug usa matag usa sa Bicol, Northern Mindanao, ug SOCCSKSARGEN.
Sa bahin sa gigikanan sa pamuhunan, nanguna ang mga kompanya nga nakabase sa Japan nga adunay ₱296.94 milyon, gisundan sa Netherlands (₱218.31 milyon), Hong Kong (₱177.03 milyon), Singapore (₱110.39 milyon), ug China (₱48.52 milyon).
Photo Courtesy: Philippine News Agency
