Nakatakda na nga i-release ang dugang Php3 million pesos nga budget alang sa House of Hope human nga nakadawat sab ug susamang kantidad sa nilabayng bulan sa Disyembre sa nilabayng tuig.
Gipaabot kini nga balita ni Konsehal Maximo Rodriguez III atol sa regular nga sesyon sa nilabayng adlaw, kung asa ang tseke alang niini nga alokasyon giproseso na sa City Finance Office.
Si Konsehal Rodriguez kinsa chairperson sa committee on social services daan na nga nisaad nga unahon ug paspasan ang pagpagawas sa pundo aron masiguro ang pagpadayon sa mga serbisyo sa House of Hope ug alang sa mga residente niini nga adunay mental health problem nga kadaghanan mga edaran na.
Gipahinumdoman usab ni Rodriguez ang City Social Welfare and Development (CSWD) ug ang mga focal person sa House of Hope nga huptan ang insakto ug bukas nga komunikasyon sa usag-usa ug sa uban pang mga opisina sa Kagamhanan sa Dakbayan.
Gipasiugdahan niya nga kini importante aron ang mga resident-patients, lakip na ang ilang mga healthcare providers, dili mabalibaran sa saktong tabang pinansyal, medikal, ug materyal sa tanang higayon.
Sukad nga gidumala sa kagamhanan sa dakbayan ang operasyon sa House of Hope, ang pasilidad gigahinan og ₱3 milyones matag tuig aron suportahan ang mga programa sa patient integration og uban pang kinahanglanon sa operasyon.
Photo courtesy: House of Hope
