Nagkahiusa ang mga opisyal sa lain-laing nasod nga miyembro sa Association of Southeast Asian Nations o ASEAN sa pagpalig-on sa ilang paningkamot aron makab-ot ang malinawon ug malungtron nga solusyon sa nagpadayon nga gubot ug armadong panagbangi sa Myanmar.
Matod ni Theresa Lazaro, Foreign Secretary sa Pilipinas, gihisgutan atol sa closed-door informal consultations ang mga posibleng lakang padulong sa kalinaw, diin gipasiugda nga ang solusyon dapat manguna ug pangunahan mismo sa Myanmar.
Ang maong mga diskusyon gipahigayon atol sa usa ka ministerial retreat sa Cebu City, diin gipaambit ni Lazaro sa iyang mga kauban sa ASEAN ang resulta sa iyang bag-ong pagbisita sa Myanmar isip gitudlo nga Special Envoy sa ASEAN Chair. Atol sa maong biyahe, iyang nahimamat ang mga lider militar ug sibilyan sa nasod.
Gipasig-uli usab sa mga opisyal ang ilang suporta sa pagpatuman sa Five-Point Consensus, ang peace plan sa ASEAN nga gitumong sa pagpahunong sa madugong panagbangi sa Myanmar.
Padayon ang panawagan sa ASEAN alang sa kalinaw, ilabi na nagpadayon ang kagubot ug armadong panagbangi human natangtang sa gahum ang civil government ni Aung San Suu Kyi niadtong Pebrero 2021.
Photo Courtesy: NET25
