Gi-anunsyo sa Bureau of Immigration (BI) nga usa ka Chinese national ang nasikop sa mga otoridad diin giingong miyembro sa salisi gang nga nalambigit sa mga pagpangawat sakay sa mga commercial airlines sa Ninoy Aquino International Airport (NAIA) Terminal 1, kagahapong adlawa, Martes, Enero 27, 2026.
Matod pa ni BI Commissioner Joel Anthony Viado, giila ang suspek nga si Zhou Wei, 52-anyos, kinsa nasikop human kini misulay sa pagsulod sa nasud diin sakay siya sa Malaysia Airlines flight gikan sa Kuala Lumpur niadtong Enero 20.
Base sa report, nasayran nga si Zhou gituohang miyembro sa usa ka organisado nga kriminal nga grupo nga gilangkuban sa mga Chinese nga nalambigit sa pagpangawat sakay sa mga eroplano sa lain-laing mga airline.
Gani, napukaw ang attensyon sa mga otoridad human nga adunay usa ka taho gikan sa BI Advance Passenger Information System Operations Center nga miingon nga si Zhou usa sa mga miyembro sa mga banggiatang salisi gang.
Dugang pa ni Viado, nga ang operasyon nahimong posible human sa paggamit sa UN goTravel software sa United Nations Office of Counter-Terrorism ingon man uban sa tabang usab sa gobyerno sa Australia. Tungod niini, wala na gipadayun pa sa mga otoridad si Zhou nga musulod sa nasud ug gilayong gipabalik sa iyang nasud nga gigikanan ug gilakip na usab kini sa blacklist nga nagpasbaot nga gidid-an ang maong langyaw nga musulod pagbalik sa Pilipinas.
Samtang gipasabot sa mga otoridad nga sagad sa mga kremin nga ilang ginabuhat naglakip sa pagpangawat ug kwarta ug uban pang mahalong butang gikan sa hand-carry nga bagahe nga gibutang mismo sa overhead compartment sa ubang mga pasahero.
Photo Courtesy: LankaXpress
