Nagtanyag ang Department of the Interior and Local Government (DILG) og ₱10-milyon nga ganti alang sa impormasyon nga mosangpot sa pag-aresto sa negosyanteng si Charlie “Atong” Ang, kinsa karon giisip nga “most wanted” nga pugante sa ahensya.
Sumala ni DILG Secretary Jonvic Remulla, si Ang giisip nga armado ug delikado base sa mga report sa paniktik nga siya nagbiyahe uban sa labing menos 20 ka mga bodyguard, bisan pa sa pagkansela sa iyang mga lisensya sa armas.
Dugang pa sa kalihim nga si Ang naanad na sa bayolenteng pakiglabot sa mga awtoridad, mao nga ang mga tigpatuman sa balaod gipasidan-an nga mag-amping sa pagpahigayon og mga operasyon batok kaniya.
Gipasalig ni Remulla nga gamiton sa gobyerno ang tanan nga legal nga paagi aron madakpan si Ang ug nga walay extrajudicial killings nga mahitabo.
Ang tibuok 320,000 ka miyembro sa PNP mangita niya sa tibuok Pilipinas. Sumala sa DILG, ang ₱10-milyon nga ganti gikan sa intelligence fund sa departamento ug ihatag nga walay pangutana” sa bisan kinsa nga makahatag og impormasyon nga direktang mosangpot sa pagkadakop ni Ang.
Samtang, si Criminal Investigation and Detection Group (CIDG) Director PMGen. Robert Morico II miingon nga ang mga awtoridad naningkamot sa pag-serve og mga arrest warrant sa upat ka nailhan nga lokasyon nga nalambigit kang Ang sa Metro Manila, Lipa City, ug Laguna, apan wala siya makit-i sa nahisgutang mga lugar.
Photo Courtesy: DILG
