BUNTIS GITULIS, KAPIN ₱100K NATANGAG SA TULISAN

Gitulis sa usa ka habal-habal drayber ang pasaherong buntis sa hilit nga bahin sa Fe Ayala Village, barangay Mankilam Tagum City, Davao del Norte bandang alas-9 ang takna sa buntag, Enero 15, 2026.

Giila ang biktima nga si alyas Rose, residente sa Purok Bagani, Barangay Cuambogan, sa nahisgutang syudad ug probinsya.

Subay sa inisyal nga imbestigasyon sa Tagum City Police Station, mibiya ang biktima sa ilang panimalay aron mopalit sa ilang binulan nga grocery supplies, sakay sa usa ka habal-habal padulong unta sa sentrong bahin sa syudad.

Samtang nagabiyahe, nabantayan sa biktima nga dili mao ang dalan nga ilang giagian hinungdan nga iyang gipahimangnoan ang driver nga mao usab ang suspetsado, apan wala siya panumbalinga niini.

Musuway unta kini og ambak gikan sa motorsiklo apan nabalaka siya sa kahimtang sa iyang gisabak nga pito na kabulan.

Pag-abot sa lugar sa insidente, gipahunong sa suspek ang iyang gimanehong motorsiklo ug didto na mideklara og hold-up dayon tion og hait nga hinagiban ngadto sa tiyan nga bahin sa maong biktima.

Wala na kini nahimo pa gawas sa paghatag sa iyang sling bag diin anaa ang iyang wallet, identification card, driver’s license, two (2) Land Bank ATM cards, grocery cards, PRC ID, usa ka Realme 12 Pro cellular phone nga nagkantidad og Php35,000 ug cash nga Php78,000 dayon sibat sa direksyon padulong sa Barangay Mankilam proper.

Naglusad na ang Tagum PNP og hot pursuit ug dragnet operation ug nakigkoordinar na usab sa Police Provincial Office alang sa pagpakatag sa impormasyon sa mga silingang estasyon sa kapulisan alang sa posibleng pagkasikop sa naka-ikyas nga tulisan.