Gipahibalo sa Bureau of Customs (BOC) nga kapin sa Php 61 bilyones nga kantidad sa nagkalain-laing gidili ug ilegal nga mga produkto ang ilang nasakmit niadtong 2025, diin kini gilangkuban sa 1,024 ka mga operasyon.
Matod pa ni BOC Commissioner Ariel Nepomuceno, nga ang mga aksyon nga gipatuman nakatabang sa pagpanalipod sa panglawas sa publiko, pagmintinar sa patas nga kompetisyon sa merkado ug pagpanalipod sa kita sa gobyerno.
Gani, base sa datos sa ahensya ang pinakadakong mga nasakmit nila niadtong miaging tuig naglakip sa PHP28.47 bilyon nga kantidad sa general commodities, PHP17.72 bilyon sa peke nga mga butang, PHP5.63 bilyon sa peligrosong droga, PHP4.80 bilyon sa wildlife ug natural resources ingon man PHP1.86 bilyon sa mga produktong tabako.
Dugang pa niini, ang BOC nagbuhat ug 85 ka operasyon nga may kalabotan sa mga produktong agrikultura nga miresulta sa pagkumpiska sa kapin sa Php622 milyon nga kantidad sa smuggled nga mga produkto.
Photo Courtesy: inquirer.net
