Dili moubos sa 32 ka tawo ang namatay human natumba ang usa ka construction crane sa tren sa amihanan-sidlakan sa Thailand kagahapong adlawa.
Sumala sa mga report, daghang bagon sa tren ang nadiskaril ug hingpit nga naguba sa wala pa kini masunog human sa pagkatumba sa crane. Kapin sa 170 ka mga pasahero ang sakay sa tren sa dihang nahitabo ang aksidente.
Ang mga awtoridad ug emergency team miresponde dayon aron magpahigayon og search and rescue operations sa lugar sa insidente. Padayon ang pag-verify sa kinatibuk-ang gidaghanon sa mga nasamdan ug posible nga dugang nga mga namatay.
Gipahibalo sa State Railway sa Thailand nga naglunsad sila og imbestigasyon aron mahibal-an ang hinungdan sa aksidente. Gipasalig usab sa ahensya nga ang kompanya sa konstruksyon nga responsable sa crane ang manubag sa trahedya.
Ang tren gikan sa Bangkok ug padulong sa Ubon Ratchathani sa dihang nahitabo ang trahedya. Gipahigayon usab sa mga awtoridad ang review sa mga sumbanan sa kaluwasan sa mga proyekto sa konstruksyon duol sa riles aron malikayan ang susamang insidente sa umaabot.
Photo Courtesy: BERMANA
