Gipaluyohan sa Diehard Duterte Supporters (DDS) ang hulga sa impeachment batok kang Presidente Ferdinand Marcos Jr., sumala ni Palace Press Officer Atty. Claire Castro.
Si Castro miingon nga base sa mga report, usa ka magbabalaod ang giingong giduol sa mga tigpaluyo sa usa ka politiko aron iduso ang impeachment.
Gitambagan ni Castro ang mga tigpaluyo ni Bise Presidente Sara Duterte nga sa dili pa mopasaka og reklamo sa impeachment batok sa Presidente, kinahanglan una nilang tabangan ang ilang idolo.
Matod niya nga ang impeachment dili lang para sa media o pagpanghadlok tungod kay mas importante ang pagtubag sa mga isyu batok kang VP Sara sama sa giingong pagpangawat sa minilyon nga confidential funds ug ang giingong pagdawat sa minilyon nga pundo gikan sa mga drug lords.
Dugang ni Castro nga ang Presidente walay “Mary Grace Piattos” ug ang Presidente wala mangawat og kwarta. Siya ang nag-imbestiga sa mga anomalosong proyekto sa flood control.
Sa usa ka pamahayag ni House Senior Deputy Minority Leader ug Caloocan City 2nd District Edgar Erice, duha ka kongresista ang gilauman nga mo-endorso sa impeachment complaint batok kang Presidente Marcos.
Ang reklamo giingong “na-finalize” na sa “pro-VP Sara group”.
Sumala ni Erice nga gihangyo matod pa siya nga mahimong usa sa mga endorser, apan iya kining gibalibaran, tungod kay gusto niya nga adunay bukas nga huna-huna sa Committee on Justice ug dili niya gusto nga mailhan sa Duterte Group tungod kay siya usa ka tinuod nga dilawan o Liberal Party.
Gidugang ni Erice, lakip sa mga basehan sa posible nga impeachment complaint batok kang Marcos mao ang “pagbudhi sa pagsalig sa publiko” nga may kalabutan sa mga isyu sa 2023, 2024 ug 2025 national budget.
Giklaro ni Castro nga si Presidente Marcos kanunay nga andam nga motubag sa mga isyu nga gipatungha sama sa paglapas sa pagsalig sa publiko tungod sa pagpirma sa General Appropriations Act (GAA), apan wala pa siya nag-andam og impeachment complaint tungod kay wala pa’y pormal nga reklamo.
Photo Courtesy: Philippine Information Agency
