Nadakpan ang usa ka lalaki nga nangawat og car battery gikan sa usa ka sakyanan sa Sto. Niño, Luna Extension, Zone 3, Digos City niadtong nakalabay nga adlaw.
Sumala sa report sa Digos City Police Station (CPS), ang suspetsado nadakpan sa mga residente ug dayon gitawagan ang kapulisan alang sa legal nga pagproseso sa kaso.
Sa pag-abot sa police personnel, narecover ang usa ka unit Dynapower car battery gikan sa suspetsado ug giila sa biktima nga mao kini ang gikawat sa iyang compound. Gisiguro sa kapulisan nga ang suspetsado gipahibalo sa iyang constitutional rights subay sa Miranda Doctrine.
Gihatod ang suspetsado sa Digos City Police Station kauban ang biktima ug ang narecover nga baterya alang sa dokumentasyon, blotter recording, ug pagpasaka sa tukmang kaso.
Gidayeg sa Digos CPS ang vigilance ug kooperasyon sa komunidad, nga dako ang natampo sa paspas nga aksyon sa insidente. Ang maong panghitabo nagpahinumdom sa kahinungdanon sa aktibong partisipasyon sa publiko sa pagpanalipod sa kalinaw ug kaayohan sa syudad.
Photo Courtesy: DEPED DIGOS CITY
