Nagplano ang Department of Agriculture nga maglunsad ug mahinungdanong lakang padulong sa mas taas nga lebel sa transparency ug accountability pinaagi sa paglunsad sa Transparency Portal nga tawgong FMR Watch.
Sumala sa DA, ang FMR Watch usa ka plataporma nga magsilbi nga sentro sa impormasyon sa tanang mga proyekto sa Farm-to-Market Road (FMR), nga gipatuman sa nagkalain-laing bahin sa nasud.
Isip pagpangandam sa pormal nga paglusad, ang DA-Bureau of Agricultural and Fisheries Engineering (BAFE), nag-preview na sa beta version sa FMR Watch ngadto sa mga stakeholders ug sa publiko.
Tumong niini nga lakang, mao ang pagkuha og feedback ug pagsiguro sa pagkaandam sa portal sa dili pa kini hingpit nga gamiton.
Pinaagi sa FMR Watch, mahimong sayon alang sa publiko ang pagtan-aw ug pagtuki sa mga importanteng detalye sa matag proyekto sa FMR.
Kini nga mga detalye naglakip sa eksaktong lokasyon sa proyekto, ngalan sa kontraktor nga responsable sa trabaho, kinatibuk-ang gasto sa proyekto, petsa nga kini gisugdan, ug ang kasamtangan nga gidaghanon sa kalampusan.
Dugang pa, ang matag proyekto adunay QR code nga magtugot sa mga interesadong partido nga direktang maka-access sa kompleto nga profile sa proyekto ug mga dokumento nga may kalabutan sa proseso sa bidding.
Target usab sa ahensya nga ang DA motutok sa kapin sa 1,000 ka pending nga FMR projects, nga nagsugod niadtong 2021 ug gipaabot nga mahuman sa 2025.
Photo Courtesy: Alter
