Gibasura sa Department of Justice (DOJ) ang perjury complaint nga gisang-at ni Senador Jinggoy Estrada batok kang kanhi DPWH Bulacan assistant district engineer Brice Hernandez tungod sa kakulang sa igong ebidensya.
Sa 12 ka pahina nga resolusyon nga gipirmahan ni Assistant City Prosecutor Maria Emma Gille A. Mercado, gipakita nga napakyas si Estrada sa pagmatuod sa iyang akusasyon nga si Hernandez dunay malisya o intensyon dihang miakusar kini kang Estrada nga nakadawat og kickback gikan sa flood control projects sa gobyerno.
Gipatin-aw sa DOJ nga aron mapadayon ang kasong perjury ubos sa Article 183 sa Revised Penal Code, kinahanglan mapamatud-an nga bakak nga pamahayag gihimo nga adunay kahibalo ug gituyo.
Sa maong kaso, gitan-aw nga ang mga pamahayag ni Hernandez base sa iyang pagsabot ug impormasyon nga nakuha isip opisyal sa DPWH.
Giingon usab sa resolusyon nga ang Statement of Assets, Liabilities and Net Worth (SALN) nga gipasa ni Estrada dili igo aron mapamatud-an ang intensyonal nga bakak nga gikinahanglan sa perjury.
Ang reklamo gisang-at ni Estrada niadtong Oktubre human mahisgutan ni Hernandez ang ngalan sa senador ug uban pang magbabalaud may kalabutan sa giingong kickback scheme sa anomalous flood control projects nga giimbestigahan sa kongreso.
Tungod sa kakulang sa lig-ong ebidensya, dili mapadayon sa pagkakaron ang kaso batok kang Hernandez.
Photo Courtesy: Philippine News Agency
