Gideklara karon sa tanang estado ug teritoryo sa Australia ang grabi nga heatwaves, gawas sa Queensland, samtang ang nasud nagpadayon sa pag-antos sa grabe nga kainit ug delikado nga mga kondisyon sa sunog.
Sumala sa mga awtoridad, ang pipila ka mga lugar sa Australia karon nakasinati og grabe nga mga kondisyon sa sunog, ug ang mga heatwave gilauman nga mokaylap pa sa umaabot nga mga adlaw. Ang temperatura gilauman nga magpadayon sa pagsaka sa kadaghanan sa mga bahin sa nasud.
Sa Biyernes, ang estado sa Victoria mopatuman sa usa ka “total fire ban”, samtang gipataas ang fire danger rating ngadto sa “catastrophic”, ang labing taas nga lebel sa pasidaan. Tungod niini, mga 450 ka mga eskwelahan ug mga childcare center ang temporaryo nga isira isip pag-amping alang sa kaluwasan sa publiko.
Kagahapon Huwebes, ang mga bombero nanlimbasug sa pagpalong sa daghang mga sunog nga miulbo sa mga estado sa Victoria ug New South Wales. Dosena nga mga eroplano nga puno sa tubig ang gipadala aron pagpalong sa dagkong mga sunog sa kakahoyan, lakip ang mga sunog duol sa lungsod sa Wodonga.
Samtang, ang Melbourne nakasinati sa pinakainit nga adlaw niini sulod sa unom ka tuig human ang temperatura miabot sa 40.9 degrees Celsius kagahapon.
Ang mga awtoridad nagpadayon sa pagpasidaan sa publiko nga magpabiling alerto, likayan ang mga kalihokan nga mahimong hinungdan sa sunog, ug sundon ang mga tambag sa lokal nga gobyerno samtang nagpadayon ang delikado nga mga kondisyon sa panahon.
Photo Courtesy: NATIONAL MUSEUM OF AUSTRALIA
