Gikumpirma sa National Police Commission (NAPOLCOM) nga nakapasaka na sila og administrative case batok kang retired Philippine National Police (PNP) Health Service Chief, BGen. Jezebel Imelda Medina.
Sumala sa NAPOLCOM, ang maong kaso may kalabutan sa gituohang kakulang sa pagtuman ni Medina sa ilang direktiba, lakip na ang usa ka isyu mahitungod sa kaso sa usa ka pulis ug ang kontrobersyal nga pagsul-ob og mahalon nga sapatos.
Matod pa, ang sapatos nga gisul-ob ni Medina nagkantidad og PHP 70,599.75, nga halos katumbas sa usa ka buwang suweldo sa usa ka pulis nga may ranggo nga brigadier general.
Usa usab sa mga basihanan sa pagsaka sa kaso mao ang kapakyasan ni Medina sa pagtuman sa balik-balik nga hangyo sa NAPOLCOM nga magsumite og psychiatric ug psychological report sa usa ka patrolman sa Quezon City Police District (QCPD) nga nailhan usab isip usa ka vlogger nga nag-post og seditious remarks online.
Gihatagan og gibug-aton sa NAPOLCOM nga ang integridad, disiplina, ug pagsunod sa legal nga awtoridad dili opsyonal ug ang bisan unsang buhat nga makadaut sa pagsalig sa publiko sa institusyon sa kapulisan imbestigahon ug sulbaron subay sa balaod.
Photo courtesy: PBGen. Jezebel Imelda Medina facebook page
