Padayon ang pagpalambo sa imprastraktura sa syudad sa Tagum human gisugdan ang infra project, pinaagi sa City Engineer’s Office, ang pag-ayo sa Bus Stop Island nga nahimutang sa National Highway duol sa Tagum Water District.
Sumala sa opisyal nga impormasyon, ang proyekto naglakip sa pag-ayo sa kasamtangang istruktura sa bus stop, lakip ang pagpalig-on sa konkretong pundasyon aron masiguro ang kalig-on ug kaluwasan niini.
Giila nga importante ang maong inisyatiba gumikan mao sumala pa ang usa sa mga nag-unang hulatanan sa mga pasahero nga mosakay og mga pampublikong sakyanan.
Gipunting usab sa lokal nga panggamhanan sa Tagum nga pinaagi sa rehabilitasyon, mapauswag ang kaharuhay sa mga komyuter ug mapamenos ang peligro sa aksidente, ilabi na sa mga motorista nga naga-agi sa maong bahin sa kalsada.
Ang maayong kahimtang sa bus stop island makatabang sa pag-organisar sa dalan sa trapiko ug paglikay sa kalit nga paghunong sa mga sakyanan sa kilid sa kalsada.
Dugang pa, ang proyekto kabahin sa mas lapad nga programa sa dakbayan alang sa modernisasyon sa pampublikong transportasyon ug paghatag og mas episyente nga serbisyo sa katawhan.
Gilauman nga sa paghuman sa rehabilitasyon, mas mahimong luwas, limpyo, ug organisado ang paghulat sa mga pasahero sa national highway, samtang mapalambo usab ang kahimtang sa trapiko sa dakbayan sa Tagum.
Photo Courtesy: City Govt Tagum
