Nadakpan ang duha ka gituohang drug personalities ug nasakmit ang mokabat sa PHP 47,600 nga balor sa gituohang shabu sa duha ka managlahing operasyon sa kapulisan sa Surigao del Sur niadtong Enero 7 ug 8, 2026.
Sumala sa Surigao del Sur Police Provincial Office (SDSPPO) ilawom sa pagmando ni PCOL Jeffrey Lawrence D. Mauricio, Provincial Director, ang mga operasyon gipahigayon sa Tandag City Component Police Station (TCCPS) ug Tago Municipal Police Station (MPS) uban ang tabang sa Philippine Drug Enforcement Agency (PDEA).
Niadtong Enero 7, 2026 alas 11:45 sa gabii, gipahigayon sa TCCPS ug PDEA ang usa ka buy-bust operation sa Purok Venus, Brgy. Telaje, Tandag City. Nadakpan sa maong operasyon ang suspek nga giila sa alyas “Wawang,” 21-anyos, usa ka construction worker ug gi-classify isip Street Level Individual (SLI).
Narekober gikan sa suspek ang pito (7) ka heat-sealed sachets sa gituohang shabu nga may gibug-aton nga halos lima (5) ka gramo ug balor og PHP 34,000, usa ka PHP 1,000 nga buy-bust money, ug mga drug paraphernalia sama sa timbangan ug improvised scopes. Ang operasyon gipahigayon atubangan sa usa ka Barangay Kagawad, representante sa DOJ, ug media representative.
Samtang, kaganihang ala 1: 12 sa kadlawon, Enero 8, 2026, gipatuman sa Tago MPS kauban ang SDS Provincial Drug Enforcement Unit (PDEU) ang usa ka search warrant sa Purok Paraiso, Brgy. Anahao Daan, Tago. Nadakpan ang High-Value Individual (HVI) nga giila sa alyas “Jun Jun,” 41- anyos.
Nasakmit sa mga otoridad ang lima (5) ka heat-sealed sachets sa gituohang shabu nga adunay gibug-aton nga duha (2) ka gramo ug mo balor og PHP 13,600, lakip ang mga drug paraphernalia sama sa aluminum foil tooter ug strip.
Sa kasamtangan, ang duha ka suspek anaa na sa kustodiya sa ilang tagsa-tagsa nga arresting units alang sa hustong disposisyon ug andam na ang kaso nga ipasaka kanila tungod sa paglapas sa Republic Act 9165 o Comprehensive Dangerous Drugs Act of 2002.
Photo courtesy: SDSPPO
