Nayabo ang tanang karga nga buhing baboy sa usa ka metallic gray Isuzu Elf truck human kini aksidenteng nabalintong sa National Highway, Purok Nangka, Barangay Motosawa, Dumalinao, Zamboanga del Sur, niadtong nakalabay nga adlaw.
Gimaneho ang maong sakyanan sa usa ka Jeno, 48-anyos, lalaki kauban ang duha ka pasahero nga sila si Marlyn, negosyante, ug usa ka Jefrey, 18-anyos, studyante ug managsamang residente sa Lakewood, Zamboanga del Sur.
Sa inisyal nga imbestigasyon sa mga personahe sa Dumalinao Municipal Police Station ang aksidente nahitabo sa dihang mibuto ang unahang ligid sa sakyanan hinungdan nawad-an ug control ang driver.
Tungod niini nayabo ug nagkatag sa kasagbutang bahin ang mga kargang buhi nga baboy.
Swerti nga walay naangin nga laing sakyanan, samtang ang driver nakaangkon usab ug samad ug bun-og sa tuong batiis nga dali usab nga gidala sa tambalanan sa syudad sa Pagadian.
Photo Courtesy: PD ZSPPO, PRO
