Lima ka tawo ang namatay on the spot, samtang tulo pa ang naangol ug gidala sa Bislig District Hospital, human madaro sa usa ka Isuzu Wing Van ang lain-laing sakyanan sa P-8A Km.3, Brgy. Tabon, Bislig City, niadtong nakalabay nga adlaw.
Sumala sa imbestigasyon sa Bislig City Police pinaagi ni PCpl James Yrick R. Pampag, ang Wing Van (Vehicle-10) gikan sa Tagum City, puno sa groceries ug dry goods nga padulong sa Brgy. Mangagoy, Bislig City. Pag-abot sa paubos nga kurbada sa highway, giingong nawad-an ug brake ang drayber ug wala na niya makontrol ang manibela. Gisulayan pa niya og liko paingon sa wala aron mapahunong ang sakyanan apan nagpadayon sa kusog nga dagan ang maong sakyanan ug didto mibangga sa daghang sakyanan nga anaa sa dalan, lakip ang:
Vehicle-1: puti nga Kia Troop Carrier utility vehicle (PNP Special Action Force)
Vehicle-2: yellow compact trike
Vehicle-3: black Rusi single motorcycle
Vehicle-4: yellow Bajaj RE compact trike
Vehicle-5: puti nga Suzuki double cab utility vehicle
Vehicle-6: black Honda CFT125MREII motorcycle
Vehicle-7: red/black Honda CFT125MSS motorcycle
Vehicle-8: black Rusi single motorcycle
Vehicle-9: red Euro single motorcycle
Gibutyag sa kapulisan nga ang mga patay mao sila: Ronald Chato Aldemita, drayber sa Wing Van, residente sa New Corilla, Tagum City, Davao del Norte; Nestor Epis Llana, drayber sa tricycle, taga Mainit, San Isidro, Bislig City; Elisa Marzan Anigan, residente sa P-1 Sagayen, Asuncion, Davao del Norte; Usa ka babaye ug usa ka lalaki nga drayber sa motorsiklo nga wala pa mailhi.
Samtang ang tulo ka naangol ug gidala sa hospital mao ang 14-anyos nga pasahero sa tricycle, taga P-1 Sagayen, Asuncion, Davao del Norte; John Robert Tio Jomoc, helper sa Wing Van, residente sa San Roque, New Corella, Davao del Norte; Carlito Manuwawan Escobal, 47-anyos nga bystander, residente sa dapit nahitaboan.
Samtang sa pagkakaron gipalawman pa sa kapulisan ang dugang imbestigasyon aron mas masayran ang hinungdan sa trahedya.
Photo courtesy: Meridith Adlawan Calonia’s facebook account
