Nipadayag sa iyang grabeng pagmahay ang langyaw nga suspek sa kasong pagpanglugos sa 17-anyos nga dalagita sulod sa condominium sa Barangay Mabolo ning Dakbayansa Sugbo.
Atol sa pakighinabi sa suspek, nanawagan kini sa pamilya sa biktima nga mapasaylo sa iyang nabuhat. Matod sa Hapones, ika-upat na kini nga higayon nga nasayop siya sa iyang desisyon ug dako ang iyang pagtulon-an nga dili angay magdali-dali ug kinahanglan sabton una ang kultura sa Pilipinas.
Nasayran nga dili ipa-priso sa ginikanan sa menor de edad ang maong langyaw kung pakaslan ang anak niini apan nibalibad kini, hinungdan nga gipadayon ang kasong rape batok sa langyaw.
Samtang gihimakak niini ang akusasyon nga iyang gipugos nga makig hilawas ang biktima. Gibutyag usab sa hapon nga mianhi lang siya sa nasod alang sa iyang uyab niadtong Disyembre 25, og planong mobalik sa ilang lugar sa ika-upat nga adlaw.
Dugang pa niya, moabot ang pamilya niini gikan sa Japan aron mohatag og suporta ug motabang kaniya sa pag-atubang sa maong kaso.
Kasamtangan nga giandam ang tanang dokumento alang sa legal nga proseso og anaa gihapon karon sa kustodiya sa Mabolo Police station ang maong langyaw.
