Gibasura sa International Criminal Court (ICC) ang hangyo sa kampo ni kanhi Presidente Rodrigo Duterte nga makakuha og private communications tali sa Registry sa korte ug sa mga independent medical experts nga ni-evaluate sa iyang katakos sa pag-atubang sa trial.
Sa 5 ka panid nga desisyon nga pinetsahan og Disyembre 23, 2025, gipahayag sa ICC Pre-Trial Chamber I nga wala mapamatud-an sa depensa ang dinalian o “urgent” nga panginahanglan alang sa disclosure.
Nihangyo ang depensa nga ipasa sa Registry ang tanang emails, suwat, ug rekord sa telepono ngadto sa panel sa mga medical experts aron masusi kon giunsa pagpahibalo ang mga instruksyon sa korte ug kon unsa nga mga dokumento, lakip na ang medical records ni Duterte, ang gihatag sa mga eksperto.
Apan matod sa Chamber, nga gipamunuan ni Judge Yulia Motoc, ang Registry usa ka “neutral organ” nga nagsilbi lamang isip tigpataliwala sa mga eksperto.
“Giisip sa Chamber nga, sa walay dugang nga pagpamatuod gikan sa Depensa, ang pagbutyag sa ‘tanang komunikasyon tali sa Registry ug sa tulo ka mga eksperto’ dili makiangayon,” sumala sa desisyon.
Dugang pa sa korte, kompleto na ang impormasyon nga gikinahanglan sa depensa aron andamon ang ilang mga obserbasyon, ug napadala na kanila ang tanang authorized documents niadtong Septyembre 24, 2025.
Ang mga joint ug individual reports sa mga eksperto, nga napadala niadtong Disyembre 5, 2025, naglangkob na og reperensya sa mga materyales ug instruksyon nga gigamit sa ilang pagsusi.
Niadtong Agosto 2025, nimando ang korte og medical examination human nihangyo ang depensa og “indefinite adjournment” o walay gitakda nga paghunong sa mga proseso.
Sumala sa Office of the Prosecutor, giingong nagpakaaron-ingnon si Duterte nga dunay cognitive impairments aron malikayan ang paglitis, apan gihimakak sa depensa ang mga findings, nga gitawag nila nga adunay mga pagsupak o internal contradictions.
Photo courtesy: One News
