Gihangyo sa kadumalahan sa Business Permits and Licensing Office (BPLO) sa Iligan City ang tanang mga negosyante bag-o man o nagpadayon nga motuman sa balaod pinaagi sa hustong pagparehistro ug pag-renew sa ilang business permit alang sa tuig 2026.
Kahibaloan nga gi-ablihan na ang pagproseso sa business permits niadtong Enero 2, ug gipahibalo sa BPLO nga extended ang oras sa serbisyo aron maserbisyohan ang kadaghanan sa mga aplikante.
Matod pa nga abli ang extension office gikan Lunes hangtod Biyernes, alas 8:00 sa buntag hangtod alas 7:30 sa gabii, samtang alas 8:00 sa buntag hangtod alas 5:00 sa hapon sa Sabado ug Domingo, sa tulo ka mga lugar nga gilangkuban sa Robinson’s place Iligan, Gaizano Mall Iligan ug sa City Hall compound.
Nunot niini andam usab ang buhatan nga mohatag og serbisyo bisan sa mga holiday, isip kabahin sa paningkamot nga mapadali ang pagproseso sa business permit.
Samtang sumala pa usab ni Maria Rhodora Omlero, Division Head sa Premits and Licenses Division -CMO -Iligan , nga mahimo usab nga dili na kinahanglang personal nga moadto sa ilang buhatan aron mo-apply og mo-renew sa business permit, diin pinaagi sa online application system mahimo na nga isumite ang aplikasyon pinaagi sa filipizen.com, lakip ang pag-upload sa tanang gikinahanglan nga dokumento ug ang pagbayad gamit ang mga e-wallet sama sa GCash ug PayMaya.
Dugang niini gibutyag usab ni Omlero ang mga rekesitos alang sa bag-ong aplikasyon sa business permit, kung asa gikinahanglan lamang i-andam ang DTI business registration, proof of ownership sa property ug tax declaration. Alang sa mga nag-abang, igo na usab ang kontrata sa abang, nga isumitir sa BPLO alang sa beripikasyon, pag-apruba, ug pag-isyu sa permit.
Gihatagan ug gibug-aton sa BPLO nga ang hustong pagparehistro sa negosyo usa ka legal nga obligasyon, ug nanawagan sila sa tanang negosyante nga likayan ang silot ug operasyong ilegal pinaagi sa sayong pagtuman sa mga rekisito sa balaod.
Photo courtesy to: City Government of Iligan
