Gipasinati sa Department of Social Welfare and Development Field Office XII (DSWD XII) ang tinuod nga diwa sa Pasko ngadto sa mga bata ug residente sa Centers and Residential Care Facilities (CRCFs) atol sa Year-End Celebration nga gipahigayon niadtong Disyembre 25, 2025 sa The Farm, Koronadal City, South Cotabato.
Ang kalihokan napuno sa kasadya gumikan dili lang mga regalo ang gipang apud-apod sa mga residente, apan lakip na ang gugma, pag-atiman, ug ang pagbati nga nahimong bahin sa usa ka dako nga pamilya.
Kini ang ikaupat nga tuig nga gihimo sa DSWD XII ang selebrasyon alang sa mga taga CRCFs, isip pagpakita sa tinuod nga kahulogan sa Pasko, nga mao ang paghatag ug pag-atiman sa uban.
Ang kalihokan napuno sa magic show, face painting, bubble show, ug uban pa. Diin nasinatian sa mga bata ug residente ang diwa sa Pasko nga puno sa gugma ug panaghiusa, luyo pa man sa ilang pagkalayo sa ilang tagsa-tagsa ka pamilya.
