Napalgang nagbitay sa punuan sa mangga ang usa ka 30-anyos nga lalaki nga empleyado sa Philippine Coconut Authority sa Purok 5, Barangay Sayog, San Miguel, Zamboanga del Sur, adlaw’ng Dominggo, Disyembre 21, 2025.
Sa inisyal nga imbestigasyon sa Pnp San Miguel, ang maong biktima nianang adlawan mitambong pa ug family reunion kauban sa iyang pamilya apan gumikan sa gipakita niining unusual behavior gipapauli kini sa igsoon sa ilang panimalay.
Apan bisan sa gihimo nga pag alam-alam sa igsoon ngadto sa biktima wala gihapon niya kini napugngan gumikan kay midagan ang biktima palayo sa ilang balay.
Gipangita pa sa kabanay ang biktima palibot sa balay apan pipila ka oras ila na lang nahibaloan nga ang biktima nagbitay na sa usa ka punuan sa mangga nga nadiskubrehan una sa silingan nga nanugway og carabao.
Dali nga gipahibalo sa kabanay ngadto sa kapulisan ug sa RHU San Miguel ang hitabo ug nakumpirma nga walay foul play ang kamatayon sa biktima.
Segon sa pamilya, ang biktima nakasinati taud-taod na nga anxiety ug depression, diin sa karon gipahiluna na sa pamilya ang patayng lawas sa biktima aron mahatod sa katapusang kapahulayan.
