Gihatagan og dakong pasidungog ang usa ka batan-ong mag-uuma gikan sa dakbayan sa Tandag human mapili isip 2025 Young Farmers Challenge Awardee ilalom sa Start-Up Category – Surigao del Sur.
Ang gipasidunggan mao si Jhonry D. Laquinta, nga nailhan tungod sa iyang bag-ong agri-based enterprise nga Malunggay Crackers, usa ka produkto nga nagpakita sa creativity sa paggamit sa lokal nga produkto samtang nagpalig-on sa kahimsog ug panginabuhian sa komunidad.
Ang pasidungog gihatag atol sa 2025 Young Farmers Challenge Awarding Ceremonies, diin opisyal nga gihatagan si Laquinta og Certificate of Award ug ₱80,000 nga pinansyal nga tabang isip kapital alang sa dugang nga pagpalambo ug pagpadako sa iyang start-up nga negosyo.
Sumala sa mga tigpahigayon sa programa, ang kalampusan ni Laquinta usa ka pamatuod sa kakugi, dedikasyon, ug espiritu sa pagnegosyo sa mga batan-ong mag-uuma sa Tandag City, nga nagtinguha sa pagpausbaw sa sustainable agriculture ug sa pagpalapad sa oportunidad sa sektor sa agrikultura.
Gipasidunggan usab ang City Government of Tandag, ilabi na ang City Agriculturist’s Office, tungod sa ilang lig-on nga suporta sa pag-mentor ug paggiya sa mga batan-ong agri-entrepreneurs, ug sa ilang paningkamot sa pagpalig-on sa inklusibong kalamboan sa agrikultura sa dakbayan.
Photo courtesy to: City Government of Tandag
