Gipatuman na sa Department of Social Welfare and Development (DSWD) kauban ang Multi-Disciplinary Team (MDT) ang Project SAFE sa Iligan City, human sa malampusong serye sa mga training ug capacity-building activities alang sa mga miyembro nga ahensya sa MDT.
Sumala sa DSWD, gihatagan ang MDT og nagkadaiyang mga tools ug hustong kahibalo aron epektibong ma-assess ang epekto sa Online Sexual Abuse and Exploitation of Children (OSAEC) ug Child Sexual Abuse and Exploitation Materials (CSAEM) sa mga kabataan. Tumong sa proyekto ang paghatag og angay ug tukmang serbisyo sa mga survivors base sa ilang kahimtangan ug panginahanglan.
Gipadayag ni Evelyn Madrio, Head sa City Social Welfare and Development Office (CSWD-Iligan), nga usa ang Iligan City sa mga pilot local government units sa Project SAFE tungod kay kaniadto ikatulo kini sa tibuok nasud sa pinakadaghan og kaso sa OSAEC ug CSAEM.
Gipasalamatan usab ni Madrio ang proyekto tungod kay mitubag kini sa dugay nang kakulangon sa psychosocial support ug angay nga mga intervention alang sa mga biktima.
Gilakip sa Project SAFE ang paghatag og educational assistance, subsidiya alang sa foster parents, ug uban pang porma sa suporta alang sa mga survivors.
Gipasiugda usab nga samtang nagatutok ang proyekto sa healing ug recovery sa mga biktima, nagtinabangay ang local government unit ug ang International Justice System sa paghatag og hustisya alang sa mga kabataang biktima, sumala ni Armien Alorro, Chairperson sa Multi-Disciplinary Team.
Photo courtesy to: Iligan CPIO
