Human sa tulo ka sunod-sunod nga kapakyasan, sa katapusan natilawan na gyud sa UP Legends ang katam-is sa kampiyonato human nila mapilde ang Tatay Rudy’s, 54-50, aron maghari sa UP Cebu Alumni Basketball League Season 6 Tunob Cup bag-ohay pa lamang.
Naalkansi og siyam ka puntos, 30-39, ang UP Legends human sa tulo ka kuwarter sa duwa. Bisan pa niini, ilang gibali ang dagan sa panagsangka pinaagi sa usa ka eksplosibong 24-11 rally sa katapusang kuwarter nga maoy nagdala kanila ngadto sa ilang gihandum nga korona.
Nanguna sa UP Legends si Junie Alejandro nga nakapuntos og 15 puntos, upat ka rebounds ug usa ka steal, nga nahimong hinungdan sa iyang pagkuha sa Finals Most Valuable Player (MVP) award.
Dako usab og kontribusyon si Del Rosario nga may 13 puntos, unom ka rebounds, tulo ka assists, usa ka steal ug tulo ka blocks. Midugang usab si Gaspar og 11 puntos, walo ka rebounds, duha ka assists ug usa ka block aron masiguro ang kadaogan sa UP Legends.
Sa pikas bahin, si Cabrera maoy bugtong double-digit scorer sa Tatay Rudy’s uban ang 11 puntos, duha ka rebounds ug duha ka assists. Bisan pa sa ilang paningkamot, napildi sila sa makasaysayanong pagbangon sa UP Legends nga sa katapusan nakab-ot na gyud ang ilang unang kampeonato human sa daghang higayon nga kapakyasan.
